Çmimet e reja për derivatet e naftës

Duke filluar nga sonte në mesnatë, do të hyjnë në fuqi çmimet e reja me pakicë të derivateve të naftës, të cilat shënojnë rritje për një pjesë të produkteve, sipas vendimit të Komisioni Rregullator për Energjetikë (KRRE), transmeton Portalb.mk.

Sipas vendimit të fundit të KRRE-së, çmimet me pakicë të benzinave motorike rriten për 1 denar për litër. Me këtë ndryshim, çmimi i EUROSUPER BS-95 do të jetë 73 denarë për litër, ndërsa EUROSUPER BS-98 do të tregtohet me 75 denarë për litër.

Ndërkohë, çmimi i karburantit dizel EURODIESEL BS (D-E V) mbetet i pandryshuar dhe do të vazhdojë të shitet me 68 denarë për litër. I pandryshuar mbetet edhe çmimi i vajit ekstra të lehtë për përdorim shtëpiak (EL-1), i cili do të jetë 67 denarë për litër.

Sipas vendimit, çmimi i një kilogrami mazut do të jetë 33.8 denarë.

Këto ndryshime vijnë si rezultat i lëvizjeve në tregjet ndërkombëtare të naftës dhe kursit të këmbimit, faktorë që merren parasysh nga KRRE gjatë përcaktimit të çmimeve të reja. Autoritetet bëjnë të ditur se vendimi ka për qëllim harmonizimin e çmimeve vendore me trendet globale të energjisë.